Gal 2 | NAS | STEP | Teketa kivora-ita karenaumo mareꞌ tankinuko Jerusalemaꞌaape meuꞌ napoꞌ Banabas ninka, Taitas nariꞌ bokuansi.

Galatians 2

Niiꞌninge Kara okovuri nkanukai Paulaꞌ Daankiarakoꞌnaꞌ Tampaꞌ Tampauꞌnaꞌ

1 Teketa kivora-ita karenaumo mareꞌ tankinuko Jerusalemaꞌaape meuꞌ napoꞌ Banabas ninka, Taitas nariꞌ bokuansi. 2 Kumponinge botomuioꞌ nanantuꞌ eeꞌnoko tee doorenang tampara teing-koo Juꞌdeeaing-koo daankiamaung napoꞌ teing teka nauarantuꞌ, miring-poꞌnupoong naing biikanairu-koo, eeꞌ noruꞌama: Aung kapooꞌ ning poreꞌmomaung niiꞌning porora daang deeng-antavaaꞌneeng. 3 Nka tee teinge arooꞌauꞌ bane niiꞌning baka-bokunanka kontevoroioꞌ tee-koo Taitas niꞌninka nariꞌ moretuꞌnung dopaꞌ totoꞌpamparuuꞌnung-koo dootuuꞌ aapearako. Teing tee makensiꞌnavitu niiꞌmaikororiꞌ tamparima maroita kuung porouꞌning baakenemaariiꞌnaang tee tampara otootoꞌkoo Jiisuuꞌ Karistooꞌke niiꞌ amuruꞌnung Moosesi-nung botoi daiꞌari otoꞌketa tontaꞌantamurima; 4 Teinge niiꞌ daiꞌanta-koonaꞌ teeꞌ minkumaaruꞌ niiꞌ unaamori oꞌnorining. Nka tee teinge niiꞌ ninka nariꞌ miring-poꞌnupoonge nkaang tampara doorenang arooꞌaara botomaariaꞌ Taitas dopaꞌ totoꞌkoo Kirikiꞌnung deemparako, Juꞌdeeaung. 5 Okiꞌnooꞌ arooꞌ oꞌnoriaꞌ, bane batei okiꞌnamuꞌkoo. Tee kara koontoꞌ doorenang tampara-koong orari-anta-koo tauraꞌparampiaꞌ diiꞌ noruꞌdarampima. 6 Teing tee miring-poꞌnupoong deempariri kapooꞌ deeaꞌ ning-koo, aiꞌ ookara teing nariꞌ oroꞌnuka Kumponing-koo. Nka teinge tee miring-poꞌnupoonge niiꞌ ninka nariꞌ oꞌnoruꞌninge kapooꞌ niiꞌning beꞌnuꞌantavai minkuaavaꞌ ninge minkuantuꞌning-koo daua. 7 Bakei otoaꞌ. Teinge tee ning noruꞌmauꞌ Kumponinge ning arooꞌmui botomuuꞌnung tee doorenang tampara okomui bereng-antavamaꞌnaang teing-koo Juꞌdeeaing-koo teeꞌ nariꞌ Piita oko-antavura botovuuꞌnaꞌ Juꞌnupoong-koo. 8 Aiꞌ ning tee Kumponinge iriꞌ amuioꞌ tampaꞌ mintoomarako teing-koo Juꞌdeeaing-koo tasiꞌmauꞌ, teeꞌ nariꞌ Piita kara-oko-antavuioꞌ tampaꞌ mintoomparakoꞌnaꞌ Juꞌnupoong-koo. 9 Tee avuavuꞌ Kumponinge deing tasiꞌpaama Jeemisi dovange, Siipas ^{▼▼2:9Niiꞌnooꞌ miring Piita. Ooveai Jon 1:42.} eeꞌnoko Jooni, teing eeꞌning okoꞌbosiꞌnuka tampaarimainge dootuuꞌkoo, neeꞌ Banabas naanka Paulaꞌ bireng batuꞌmaaretuꞌ neeꞌ teing ninka mantaꞌka taaꞌniꞌantamaarema neeꞌ Juꞌdeeaing-anko mereeꞌnaang eeꞌnoko teing Juꞌnupoong-anko berooꞌnaang. 10 Teketa tee narung kapooꞌ masikung nko-koo naumaaretuꞌ neeꞌke, teing ataꞌoinku pakuarampeeꞌnaang, teeꞌ eeꞌnaꞌ aaꞌnaꞌ piamouꞌnaꞌke.

Piita Dovange Tampara Doorenang Orakaꞌ Pituaako Paulaꞌke Koompuruꞌnaꞌ

11 Teka tenang Siipas Antiokiꞌnavuntuꞌkoo pouꞌnang ninge tee duta-koo karavama turampantuꞌ kiimata-koo makosinaꞌ nkoarioꞌ. 12 Eeꞌ otong: Niiꞌning nantoong mmeꞌ poroaruko Jeemisi-ankoita Siipas Juꞌdeeaing ninka tampaꞌ nariꞌ taamanaakoꞌ. Teka teꞌ tavoꞌariko dopaꞌtotoꞌnavitu-pinaꞌ mantompuri damaꞌdu-aape kaiꞌaruꞌ eeꞌnoko tontaꞌaruꞌ teing tero navuarikoꞌning-ankoita. 13 Eeꞌnoko teeꞌ nkoarako teinge niiꞌninge Juꞌnupoonge Karistooꞌ siompaakoꞌninge tampara doorenang-koong aarumo nariꞌ dakaꞌpai siompauꞌ tee. Eeꞌnoko aaꞌnouꞌ Banabas nariꞌ barampauꞌ tevunge oravunge. 14 Teka tenang tampaꞌ siompaavaruko tee aarumo tampara doorenang-koong ninge ooamira Piita turampantuꞌ ookara-koo dutakanooꞌka eeꞌ minkuama, “Bane daꞌ Juꞌnupoong-koonge niikaang aarumo sipei Juꞌdeeaung-pinaꞌ nkoraramaung. Teeꞌ nkorarakotaaꞌ arekeeꞌ enang tororari bereꞌantaverimang Juꞌdeeaing Juꞌpinaꞌ otorooꞌnaang?” Teeꞌpantuꞌ.

Teing Jiisuuꞌkoo Baito-nupoong Naing Kumponinge Koontoꞌnuka Tampurimanaꞌ

(2:15–4:31)

15 Aming-koo, nnaꞌ bane niiꞌ Juꞌkoo meuꞌke pontoꞌmariruꞌning Juꞌdeeaing oreng-koo deeaꞌ, teka niiꞌke noruꞌampiri otong Kumponinge naning koontoꞌ tampuaung Moosesi-nung boto siompumaung-koo, teka Jiisuuꞌ Karistooꞌ masikaꞌantavumaung-koo deekoꞌ. 16 Eeꞌnoko niiꞌke Jiisuuꞌ Karistooꞌ baitoampiruꞌ Kumponing ninka naroomariri oꞌnoriiꞌnaang Karistooꞌ masikaꞌantavampimaung-koo, boto siompampimaung-koo deeaꞌ. Eeꞌkoo, naning otoaꞌ boto siompumaung-koo Kumponinge koontoꞌ tampupeuꞌnung. 17 Enang tee Kumponinge koontoꞌnuka tammuriainaꞌ besiꞌampiri Karistooꞌ bakanavung siompampima niiꞌnamuriiꞌ aarumo-koo basi-antamuriko deekoꞌ, Moosesi-nung botoi tauraꞌpuaung-koo, tee-koo aarumo-koo arekeeꞌ minkuampiiꞌnaang niiꞌke? Eeꞌ ee minkuampiiꞌnaang, “Karistooꞌke orara aarumo-koo basi-antamuring.”? A, teeꞌ aaꞌ deeaꞌ bakei. 18 Ninge oong boto aarempansinung siraꞌmarapeuꞌ napoꞌ daaꞌamira tee aarumo boto sionge domang-koong, tee tampara doorenang daankiama pesiꞌankotaaꞌ napoꞌ sipamira tee. 19 Nka tee ninge daaꞌampaukaꞌnung, aiꞌ ninge tee Moosesi-nung boto siompamaaꞌ noko teie teka totoraꞌmuuꞌ nkaang sionsiong-koo ning booꞌkoo tuumpimura. Teeꞌ ooansiraiꞌnange bereꞌmaruꞌ Karistooꞌkoo biꞌantamari tee ninka aaꞌbarataꞌkoo tero moontuꞌnung-pinaꞌ oꞌnoi Kumponing-ankoi domamaraaꞌnaang. 20 Tee ning nariꞌ Karistooꞌ ninka aaꞌbarataꞌkoo biꞌmari moontuꞌnung deemaritaaꞌ enang tee domaang ning-koo kuunge otoing koontoꞌ ning-koong deeaꞌ, teka tee-koo Karistooꞌ kuunge domampari otong ning-koo. Eeꞌnoko nkaang otootoꞌ enang oꞌnomaung anke kansiꞌkoo Kumponing Bauring masikaꞌantavansi domamari oꞌnomaung, eeꞌnara piaamura avaruꞌnung ning-koo booꞌparaaꞌnaang. 21 Kumponinge naning koontoꞌ tampupeuꞌnung dei aarumo boto sionge domang-koong paaravuko deekoꞌ, Karistooꞌnung booꞌ tamunsiꞌnung deemparapeuꞌ. Teeꞌkoo temuriiꞌ aarumo napoꞌ daaꞌampaukaꞌnung Kumponinge avusiroꞌari tampaꞌ nkomuuꞌnaꞌ tamunsiꞌnung deemparaꞌneeng-koo.